APLAYA

Natinggaw dagiti main-inaw
Arasaas; dalluyon nga umarararaw
Umag-agek, pulos a di mabannogan
Kadagiti rukib, natingra a kadilian.

Naannayas, aweng dagiti arimpadek
Parnuayen a ritmo dagiti baddek
Bayat panagpadas a mangrukod
Aplaya a rangtay dagiti sungbat ken saludsod.

Nupay adda saning-i’t naibudi
Kadagiti lung-ay, addang a napnuan sudi
Nalinteg, takap dagiti tugot
Imalmaldit; dagiti sennaay nga inka imbulos

Kas kinamaris dagiti panagtabon
Mangyaw-awan kinakawaw gapu’t ipapanaw
Daras a pugasen rumusing nga aligaga
Mangandingay; mangay-ayo iti agpauyo a malem.

Awan patingga na a talinaay,
Iyar-arasaas tunggal isasangbay
Naumbi nga agek kadagiti dapan
Itunda’t manggargari a puyupoy ti amian.

Wen, kukuam dagiti kanito,
Tunggal panagwaywayas a mangpadas
Mangarakup iti bugas dagiti arapaap
Gagem a naitalimeng, agbibiag iti kaunggam.



©09december2007leofinajanegalleta