PANAGTABON

Mangrugin a maiwayat dagiti addang
Mangipatungpal naisangsangayan a ritwal
Mamagkamet lubong tapno maipasngay
Linabag dagiti balikas, gameng nga ik-ikutam.

Itunda’t ayos dagiti baresbes
Pumsuak manipud lansad dagiti ubbog
Pagbiagan pannakaawat a mangparut
Puris, anniniwan; imbakbaklaymo a kalman.

Palubosam pammakada a danapeg
Dagiti kallautang a lagip, batibat ket ammangaw
Tinagibi’t rungsot, dawel dagiti dangadang
Rurog dagiti karit, kalman a pinarukmam.

Agur-uray, wayawaya a naibudi
Kadagiti tagainep, nailibay nga ulimek
Linglingay bugbugtong a padeppa
Ladawan a nangpanday,agdama ken masakbayam.

Bay-am ngarud dagiti allangogan
A kumuyog panagtabon a matmatmatam
Awatem kadin pammakada a taldiap
Mangwaknit tangatang, lubong a pagbibiagam.

Wen, itulnogmo itan, anaraar dagiti lagip
Adda dagiti tugot, ladawan, batonlagip
Tumpuarto’t balikas ken ritmo kadagiti parapo
Kas dara nga agtaeng kadagiti urat, lansad kinataom.



Copyright: Leofina Jane G. Galleta
All rights Reserved.©2008leofinajanegalleta