Maregmeg

Matmatam,
Dagiti binukel
A maregmeg,
Dagiti tagainep.

Bagnos,
Di agsarday a baddek
Ket mangtimon,
Kapanunutan a tiweng.

Sumaggaysa,
Dagiti pitik
Kas arimbangaw,
Pangen ni sayangguseng.

Agragut,
Dagiti nabaktawan a lagip
Kas nagpanawan,
Dagiti nakeltay a rissik.

Umagibas latta,
Apagapaman nga arasaas
Naruay a mangbikag,
Kadagiti dapan nga agtukiad.

Ta inadipen man,
Saludsod nga agsasallupang
Manggay-at kadi,
A mangtimon wenno mangpaldaang?

Padasen latta,
A gaw-aten dagiti raya
Makapurar a rimat,
Dagiti arapaap.

Ket buyogan,
Tarnaw ni kinapudno
Mamagtamed,
Langit dagiti darepdep.

Bay-am,
Ti lubong a mangaming
Kadagiti pagteng,
Nakaikarian a di magawidan.

Ket sarangtem,
Dagiti babak
Ken sarakem,
Ubbog dagiti ganuat.

Wen, kabalinam
Nga ikutan ti lubong
Tunggal maisaruag,
Daklis ti masakbayan.

Ket mangummong,
Dagiti maregmeg
Ken binukel,
Bin-i nga ik-ikutam.

Also submitted for Iluko.com Published Articles

Copyright to: Leofina Jane Galleta
All Rights Reserved. ©2008leofinajanegalleta
June 10, 2008